Meded kıl tövbe ettim her günâha yâ Resûlallah

Meded kıl tövbe ettim her günâha yâ Resûlallah 

İnâyet eyle abd-i rû-siyâha yâ Resûlallah 

Bu gün üryân-ı aşk ü bende-i Âl-i âbâ oldum 

Ki bakmam hırka vü tâc ü külâha yâ Resûlallah 

Gedâyân-ı der-i şevket-medâr-ı dâr-ı irfânın 

Ayağın öptürürler pâdişâha yâ Resûlallah 

Tesellî-i cemâl ü nûr-ı aşkın var iken dilde 

Nazar kılmam felekte mihr ü mâha yâ Resûlallah 

Nigâh-ı iltifâtınla nazar kıl mazhar-ı lütfet 

Gönül âyînesin sırr-ı İlâh’a yâ Resûlallah 

Eriştir menzil-i maksûda Aynî rûz-i şeb düşmüş 

Tarîk-i Mevlevî’de âh ü vâha yâ Resûlallah 

 Aynî kuddise sırruhu’l-azîz 

Yüzün mir’ât-ı ‘ayn-ı Kibriyâ’dır yâ Resûlallah 

Vücûdun mazhar-ı nûr-ı Hudâ’dır yâ Resûlallah 

Kabûl eyle onu aşkından âzâd eyleme bir ân 

Kapında Âdile kemter gedâdır yâ Resûlallah 

Var iken dest-gîrim sen gibi bir şâh-ı zîşânım 

Kime arz eyleyem eyle meded hâl-i perişânım 

Sözün makbûl-ı dergâh-ı Hudâ’dır ulu sultânım 

Kapında Âdile kemter gedâdır yâ Resûlallah 

Esîr ü bî-kesim bu âlem-i mihnetde ey şâhım 

Bu yolda ne meded-kârım ne kaldı bir ümîd-gâhım 
Fedâ olsun reh-i aşkında mâl ü devlet ü câhım 
Kapında Âdile kemter gedâdır yâ Resûlallah 
Sana ümmetliğim iki cihânda emr-i câzimdir 
Bilirsin hâlimi arz u beyân etmek ne lâzımdır 
Nazar kıl lütf ile senden diğer kim çâre-sâzımdır 
Kapında Âdile kemter gedâdır yâ Resûlallah 
Âdile Sultan kuddise sırruhu’l-azîz